Text Express: Word Adventure

AG.- Comezamos un novo curso coa proposta de Text Express: Word Adventure, un xogo para dispositivos móbiles que vai moito máis alá do xogo de palabras estándar. A través dos encrucillados que cómpre ir resolvendo, faise unha viaxe polo mundo de Text Express nun tren antigo para descubrir novos lugares e personaxes e axudar a súa protagonista, a enxeñeira Tilly, a desbloquear o seu verdadeiro destino. A inclusión e o empoderamento feminino son parte integral deste xogo.

O enredo foi lanzado en inglés. Unha atraente oportunidade de aprendizaxe para quen queira perfeccionar o idioma. A variedade de escenarios e niveis dispoñibles permítelle ao xogador ou xogadora reforzar vocabulario e ortografía. Definitivamente, un valor engadido!

Text Express: Word Adventure está dispoñible de balde para iOS e Android desde o 1 de setembro. Foi creado por Story Giant Games, un pequeno estudo independente holandés, e publicado por GameHouse.