A torre das sumas
AG.- Estamos seguras de que moitas e moitos de vós xogastes algunha vez coa torre de bloques de madeira, a jenga. Hoxe, a mestra Fátima Rúa quere compartir con vós un uso diferente. Ben sabedes que xogando podemos aprender moito!
A idea consiste en escribir nos bloques de madeira diferentes sumas. Podémolo facer:
- Aleatoriamente
- Por cores (a táboa de sumar de cada número cunha cor diferente)
- Escribindo algúns bloques e deixando outros en branco
…como queirades!
O xogo consiste en montar a torre (con tres bloques por piso) e, por quendas, ir quitando un dos bloques do medio e colocalos na parte superior. A novidade deste xogo consiste en que, antes de colocar o bloque extraído, debemos resolver a suma escrita mentalmente (non vale usar lapis e papel).
Se realizamos ben a suma, podemos colocar o bloque. Se fallamos, esperamos unha quenda sen xogar. Perde o xogador que faga caer a torre ou aquel que teña máis de cinco erros nas sumas.
Animádesvos a xogar nesta versión?
Xogo da torre das sumas.