COCIÑANDO… BISCOITO  DE  MIRIAM (SEN GLUTE)

AG.- Miriam, a nai de Dani, animoume a cociñar este biscoito sen glute. Riquísimo! E o mellor é que, a min, que non son nada xeitosa cos biscoitos, saíume á primeira, tenro e saboroso! Ela deixounos a súa receita aquí.

MOITAS GRAZAS MIRIAM!

Animádevos a facelo, xa nos contaredes!

INGREDIENTES:

-1 sobre de lévedo (tipo “Royal”).

– 3 ovos.

– 1 limón: riscada da peladura / zume do medio limón.

-1 iogur natural.

Pola medida do vaso do iogur:

• 1 vaso de aceite.
• 2 vasos de azucre.
• 2 vasos de fariña de arroz.

Manteiga para untar o molde e que non se pegue o biscoito.

COMO FACELO:

Prequentar o forno a 180ºC.

Untamos con manteiga o molde que imos usar para cocer o biscoito.

Nunha ensaladeira riscades a peladura do limón (anteriormente ben lavada) e espremedes o zume da metade dese mesmo limón.

Miriam díxome que o zume era conforme gustos. Nós puxemos o zume do medio limón.

ENGADIDES o iogur, os ovos, o aceite, o azucre, a fariña de arroz e o lévedo.

XUNTADES todo coa batedora (coas coitelas, sen usar as baleas) durante un par de minutos, ata que os ingredientes estean ben mesturados.

VERTEMOS a mestura no  molde que eliximos e metémolo no forno 40 minutos a 180ºC. Despois deste tempo, comprobamos se está cocido picando o biscoito coa axuda dun pau de cociña (para espetadas, escarvadentes,…). Estará feito, se o pau sae limpo sen restos de masa. Como vimos dicindo nas receitas, cada forno é diferente, en cada casa e sodes vós quen axustades eses tempos.

SACAMOS DO FORNO PARA QUE NON SEQUE e quede esponxoso.

Tomar frío só ou con leite, infusión…

***NOTA DE MÍRIAM: Unha vez feita a mestura, pódeselle engadir froitos secos, froitas deshidratadas, pebidas de chocolate… antes de enfornar.

Lucía Lence Expósito

Esta obra ten unha licenza Creative Commons Atribución-Non comercial-Compartir igual 4.0 Internacional.