Zume de laranxa: pura vitamina C!

AG.- Estes días nos que boa parte das familias se xuntan e nos que non andamos tanto ás présas como de costume, podemos deixar que os máis pequenos e pequenas da casa nos axuden na elaboración do noso almorzo saudable.

É igual que teñades un espremedor eléctrico que un manual, o importante é que “sintan” o gusto e responsabilidade por axudar a facer “unha parte importante” do almorzo.

Unha vez posta a mesa e, mentres se está a quentar o leite, preparando as torradas ou mesmo preparados os cereais ao lado da cunca, podemos preparar un REFRESCANTE e SABOROSO ZUME DE LARANXA.

E preguntarannos:

POR QUE?

Porque, mentres o facemos…

IMOS OBSERVANDO e FALANDO que…

Esa “froita de tempada”, en forma de “esfera” (ou non)…

E que ule taaan ben (ulimos)…

Ímola cortar* “á metade” (recendo máis intenso) e…

Collendo cada unha das metades pola “monda”…

Colocándoas na “punta” do espremedor e…

“Presionando” coa nosa man “aberta” e xirándoa coa axuda do pulso, obtemos a pulpa (sólido)… ás veces con pebidas (que podemos gardar para logo sementar) e o zume (líquido) que imos beber…

PARA QUE?

Para fortalecer as nosas defensas e que desaparezan os virus que nos fan esbirrar ou tusir, protexer os nosos dentes e os nosos ósos (calcio) e para previr e non sufrir no baño axudando a que a nosa caca estea “máis branda”, polo seu contido en fibra.

TAMÉN TEMOS QUE DICIR

que esta fermosa froita úsase para a elaboración de biscoitos e marmeladas caseiras que se usan nos almorzos, como aderezo ou ingrediente para ensaladas e para algún guisos de carne ou mesmo de peixe.

A que non sabíades que facendo zume de laranxa se poden traballar tantos contidos?:

• Contar as laranxas que leva cada vaso de zume.
• Medir se cunha laranxa se enche o vaso “pouco”, con dúas “moito”, cunha “máis” ou se cunha metade é “dabondo”.
• Repartir unha xerra de zume entre 3,4,5…vasos grandes, pequenos…é necesario facer “máis”?
• Pensar se sobrou moito zume, que podemos facer con el? Mañá hai que facer “menos”?…

E todo o que se vos ocorra!!

Ah!! E non esquezades meter as mondas no colector de lixo orgánico!!!

*Cortar: o adulto valorará a idade das nenas e nenos para cortar as laranxas á metade sós e soas ou con axuda.

Lucía Lence Expósito.